पूर्वविद्यार्थी समाज‚ सुकुना बहुमुखी क्याम्पस‚ सुन्दरहरैँचा‚ मोरङको आयोजनामा मिति २०८० फागुन १८ गते शुक्रबारका दिन क्याम्पस सभाकक्षमा सेयर सचेतना कार्यक्रम सम्पन्न गरिएको छ । उक्त सचेतना कार्यक्रम विहानी र दिवासत्रमा सञ्चालन गरिएको थियो । विहानीसत्रमा सञ्चालित कार्यक्रममा एबिएस‚ बिएड‚ बिबिएस र बिएमा अध्ययनरत विद्यार्थीहरू सहभागी भएका थिए । त्यसैगरी दिवासत्रमा बिएस्सि र बिबिएमा अध्ययनरत विद्यार्थीहरू सहभागी थिए । कार्यक्रममा शिक्षक तथा कर्मचारीहरूको पनि उपस्थिति रहेको थियो । दुबै सत्रका कार्यक्रममा विशेषज्ञका रुपमा आमन्त्रित एसपिएसए सेक्युरिटिज लिमिटेड ब्रोकर ८७ का चार्टर एकाउण्टेण्ट एवम् डाइरेक्टर श्री सुभाष आचार्य र अर्का डाइरेक्टर मोहन चम्लागाईँ ले सेयर तथा सेयस बजारको अर्थ‚ उद्धेश्य‚ सेयर बजारमा प्रवेश गर्ने तरिका‚ यसका फाइदा‚ सेयर कारोबारबाट फाइदा आर्जन गर्ने तरिका‚ सेयर बजारमा अपनाउनु पर्ने सावधानीहरू‚ सेयर कारोबारका तरिकाहरू‚ ब्रोकर बन्नका लागि हुनुपर्ने गुण तथ कार्यहरू‚ सेयर कारोबारबाट गर्न सकिने आर्थिक तथा व्यवसायिक प्रगति‚ सेयरबजारले अर्थतन्त्रमा पार्ने बहुआयामिक प्रभावका विषयमा सहभागी विद्यार्थी‚ शिक्षक‚ कर्मचारीहरू र पूर्वविद्यार्थीहरूलाई अभिमुखीकरण गर्नु भएको थियो ।
सुकुना बहुमुखी क्याम्पस‚ सुन्दरहरैँचा‚ मोरङको अतिरिक्त क्रियाकलाप समितिको वार्षिक कार्ययोजनाअनुसार विभिन्न तह‚ सङ्काय र कक्षाहरूमा अध्ययनरत विद्यार्थीहरूका लागि फागुन ३ गते देखि १८ गतेसम्म एथलेटिक्स‚ भलिवल‚ क्रिकेट‚ वास्केटवल र फुटवल खेलकुद कार्यक्रम सञ्चालन गरी सो कार्यक्रम शुक्रबार सम्पन्न गरिएको छ । उक्त कार्यक्रममा एथलेटिक्सतर्फ १०० मिटर दौडमा ७ जना छत्र र ९ जना छात्रा‚ २०० मिटर दौडमा ७ जना छात्र र ९ जना छात्रा‚ ४०० मिटरम १० जना छात्र र ८ जना छात्रा‚ ८०० मिटर दौडमा ५ जना छात्र र ६ जना छात्रा र १५०० मिटर दौड ८ जना छात्र र ६ जना छात्रा सहभागी भएका थिए । हाइजम्प खेलमा १८ जना छत्र र ११ जना छात्रा ‚ लङजम्प खेलमा १९ जना छात्र र १४ जना छात्रा तथा सटपुट खेलमा ९ जना छत्र र १६ जना सहभागी भएका थिए । भलिवल खेलमा छात्रातर्फ जम्मा ५ वटा टिम रहेकोमा बिबिएस‚ बिएस्सि‚ बिएडको संयुक्त टोली प्रथम र बिबिएस‚ बिएस्सिको टोली द्वितीय भएको र छत्रतर्फ जम्मा १३ टिम रहेकोमा बिबिएस‚ बिएस्सि‚ बिएडको संयुक्त टोली प्रथम र बिबिएस‚ बिएस्सिको टोली द्वितीय भएका छन् । क्रिकेटतर्फ जम्मा १० वटा टिम सहभागी भएकोमा बिआईसिटीईले प्रथम स्थान र बिबिएस कक्षाले द्वितीय स्थान हासिल गर्न सफल भएका छन् । बास्केट वल खेलमा जम्मा ६ समूह सहभागी भएकोमा बिबिएस चौथो वर्षको समूह प्रथम र बिबिएस तेस्रो वर्षको समूह दोस्रो भएका छन् । फुटवल खेलतर्फ जम्मा २० टिम सहभागी भएकोमा बिबिएस समूह प्रथम र बिएड/बिआईसिटिई समूह द्वितीय भएका छन् । क्याम्पसले मिति २०८० फागुन २३ गतेका दिन एक कार्यक्रमको आयोजना गरी विभिन्न खेलमा प्रथम र द्वितीय हुने विद्यार्थीहरूलाई पुरस्कारको व्यवस्था गरिएको छ । जसअनुसार भलिवल‚ फुटवल‚ वास्केटवल र क्रिकेटमा प्रथम हुने प्रत्येक समूहलाई रु. १०‚५००/- नगद ‚ मेडल र प्रमाणपत्र तथा द्वितीय हुने प्रत्येक समूहलाई रु.५‚५००/- नगद‚ मेडल र प्रमाणपत्र तथा एथलेटिक्स तर्फ प्रथम‚ द्वितीय र तृतीय हुनेलाई मेडल र प्रमाणपत्रबाट सम्मान गरिएको छ ।
मिति २०८० फागुन १३ गतेका दिन यस सुकुना बहुमुखी क्याम्पस, सुन्दरहरैँचामा त्रिवि, व्यवस्थापन सङ्कायका डीन प्रा. डा. डिल्लीराज शर्माबाट बिबिए र एमबिएसका विद्यार्थीहरूलाई अतिथि प्राध्यापकका रुपमा विहान ७:०० बजे देखि अपरान्ह ४:०० बजेसम्म शिक्षण तथा अभिमुखीकरण कार्य सम्पन्न भएको छ । विहान एमबिएस प्रथम र द्वितीय सिमेष्टरका विद्यार्थीहरूलाई सिमेष्टर प्रणालीमा शिक्षक र विद्यार्थीले गर्नु पर्ने कार्यहरू, मूल्याङ्कन पद्दति, शिक्षण विधि, परियोजना कार्य, खोज तथा अनुसन्धान, अनुसन्धानात्मक लेख लेखन तथा प्रकाशन, रोजगारीको सिर्जना, बजारीकरण, पाठ्यक्रमको कार्यन्वय, नेतृत्व विकास, श्रम बजारमा व्यवस्थापन विषयका विद्यार्थीहरूको पहुँच र व्यक्तित्व विकासका तरिकाका विषयमा अभिमुखीकरण गर्नु भएको थियो । दोस्रोसत्रमा प्रा.डा. शर्माले बिबिए तर्फ प्रथम, तेस्रो, चौथो र छैटौँ सेमिष्टरका विद्यार्थीहरूलाई केस स्टडि, परियोजना कार्य, प्रतिवेदन लेखन, सर्भे, खोजकार्यको प्रस्तुतीकरण, अध्ययन तथा शिक्षण विधि, मूल्याङ्कन पद्दति, व्यक्तित्व विकास गर्ने तरिका, समय व्यवस्थापन र विश्व बजारमा व्यवस्थापन विषयको सम्भावनाका विषयमा अभिमुखीकरण गर्नु भएको थियो ।
मिति २०८० फागुन ११ गते शुक्रबारका दिन क्याम्पसमा अध्ययनरत विद्यार्थीहरू बिच मुक्तक वाचन प्रतियोगिता कार्यक्रम सम्पन्न भएको छ । अतिरिक्त क्रियाकलाप समिति र नेपाली विभाग अन्तर्गतको अतिरिक्त क्रियाकलाप उपसमितिको आयोजनामा र विदुर सुवेदीको सभापतित्वमा
सञ्चालन भएको मुक्तक वाचन प्रतियोगिता कार्यक्रममा २४ जना सर्जक विद्यार्थीहरूले प्रतियोगितात्मक मुक्तक वाचन गरेका थिए । उक्त
कार्यक्रममा प्रथम स्थानमा दिलकुमार सुयल‚ द्वितीय स्थानमा सत्तिस कार्की‚ तृतीय स्थनमा एलिना थापा र सान्त्वनामा सज्जल भट्टराई छनोट
भएका थिए । उक्त कार्यक्रमको सञ्चालन आयोजक समितिका सदस्य एवम् शिक्षण सहायक रेखा सुवेदीले गरेकी थिइन् ।
मिति २०८० फागुन १० गते विहिबारका दिन एक समारोहमा सुकुना बहुमुखी क्याम्पस‚ सुन्दरहरैँचा‚ मोरङ र जनमैत्री बहुमुखी क्याम्पस‚
कुलेश्वर‚ काठमाडौं बिच अनुसन्धान‚ शिक्षण कौसल‚ ज्ञान अभिवृद्धि र संस्थागत सञ्जाल तथा सम्बन्धको विकास र ती क्षेत्रहरूमा सहकार्य गर्ने
विषयमा द्विपक्षिय सम्झौता सम्पन्न भएको छ । दुबै क्याम्पसका क्याम्पस प्रमुख द्वय अर्जुनराज अधिकारी र भोलानाथ ओझाको रोहवरमा सुकुना
बहुमुखी क्याम्पसको अनुसन्धान व्यवस्थापन एकाइका प्रमुख गणेशप्रसाद दहाल र जनमैत्री बहुमुखी क्याम्पसका अनुसन्धान व्यवस्थापन एकाइका
प्रमुख अनिलप्रसाद भुषालले सम्झौतापत्रमा हस्ताक्षर गरी सम्झौतापत्र आदान प्रदान गरेका थिए ।
